Мадриднинг «Атлетико» клуби ҳужумчи Хулиан Альвареснинг келажаги билан боғлиқ миш-мишлар фонида «Барселона» ва футболчининг вакиллари ўртасида ўтказилиши режалаштирилган учрашувга тақиқ қўйди. Бу ҳақда инсайдер Вероника Брунати хабар бермоқда.

Манбанинг таъкидлашича, Каталония клуби ва аргентиналик форварднинг агентлари айнан бугун музокаралар столига ўтиришни мақсад қилишган эди, бироқ пойтахт клуби бу мулоқотнинг амалга ошишига қатъиян қаршилик кўрсатган.

«Матрасчилар» раҳбарияти ушбу масала бўйича ўз позициясини аниқ ва лонда баён қилган: «Футболчи трансферга қўйилмаган. Унинг амалдаги шартномаси мавжуд ва биз ундан жуда мамнунмиз».

Бундан ташқари, Мадрид гранди Альваресни 2026/27 йилги мавсум режаларига киритган ва ҳозирги шароитда унинг жамоани тарк этиши борасида ҳеч қандай музокара олиб бориш ниятида эмас. «Барселона» раҳбарияти ҳам «Атлетико» улар таклиф қилаётган шартлар асосида мулоқотга киришмаслигини тушуниб турибди, бу эса трансфер бўйича илгарилаш имкониятини йўққа чиқаради.

Шунингдек, хабарда қайд этилишича, аргентиналик иқтидор эгаси атрофидаги вазиятни Лондоннинг «Арсенал» ҳамда Франциянинг «ПСЖ» клублари ҳам диққат билан кузатиб бормоқда.