Бразилия терма жамоаси бош мураббийи Карло Анчелоттининг ўғли Давиде Анчелотти Франция клубини бошқарадиган бўлди. «Лилль» 36 ёшли мутахассиснинг бош мураббий этиб тайинланганини эълон қилди.
Кичик Анчелотти 2028 йилнинг ўрталарига қадар мўлжалланган меҳнат шартномасини имзолади. Давиде Анчелотти бунгача Карло Анчелоттининг мураббийлар штабида ишлаган. Мустақил мураббий сифатида эса Давиде фақатгина 2025 йилнинг июль-декабрь ойларида «Ботафого» жамоасини бошқарган.
Эслатиб ўтамиз, «Лилль» Франция чемпионатида учинчи ўринни эгаллаб, Чемпионлар лигасининг умумий босқичига тўғридан-тўғри йўлланма олган эди. Шундай бўлса-да, «итлар» яқинда Бруно Женезио билан хайрлашди. Ушбу мутахассис жамоа билан икки мавсум ишлаган эди.
