Журналист Гастон Эдул ҳужумчи Хулиан Альварес ёзги трансферлар ойнасида жамоасини ўзгартиришига ишонмоқда.
«Хулиан Альварес келаси мавсумда ҳам «Атлетико»да ўйнашини жуда қийин, ҳатто деярли имконсиз деб ҳисоблайман», — дея Эдулнинг сўзларини келтиради «Mundo Deportivo».
Шу билан бирга, журналист «Атлетико» аллақачон Альварес бўйича иккита таклифни — «Барселона» ва «ПСЖ»дан келган хатларни рад этганини таъкидлаб ўтди. Хулиан Альвареснинг келажаги борасидаги миш-мишлар яқин орада камаймаслиги аниқ.
Эслатиб ўтамиз, 26 ёшли аргентиналик футболчининг «Атлетико» билан тузган шартномаси яна тўрт мавсумга мўлжалланган. Аввалроқ Альваресга «Барселона» лойиҳаси маъқул келаётгани ва футболчи «Камп Ноу»да тўп суришни исташи хабар қилинган эди.
