«Барселона» ва Испания терма жамоасининг собиқ футболчиси Жорди Альба Ламин Ямал ва Лионель Месси ҳақида яна ўз фикрини билдирди. Собиқ ҳимоячидан «кўк-анорранглилар»нинг 18 ёшли юлдузини клубнинг аргентиналик афсонаси билан солиштириш қанчалик ўринли экани ҳақида биринчи марта сўрашмаяпти. Альба ўз фикрида қатъий қолмоқда.

«Ямал — фавқулодда иқтидор эгаси. Уни ҳали 15 ёшлигидан эслайман: албатта, ўшанда у ҳозиргидек ривожланмаган эди, лекин унинг бетакрор техникаси ўшандаёқ кўзга ташланган. Агар Месси билан солиштириш ҳақида гапирадиган бўлсак... Ҳа, Ламин «Барса»да ажойиб ўйин кўрсатмоқда, аммо мен Леони тенгсиз, тарихдаги энг яхшиси деб биламан. Уни ҳеч ким билан солиштириб бўлмайди. Криштиану Роналду ҳам буюк фаолият ўтказди, лекин мен ҳеч қачон Мессига ўхшаш ўйинчини кўрмаганман», — деб келтиради испан ОАВлари ўтган йилнинг охирида фаолиятини якунлаган Альбанинг сўзларини.

37 ёшли испаниялик футболчи Лионель Месси билан нафақат «Барселона»да, балки «Интер Майами»да ҳам бирга тўп сурган.