«Ювентус» ҳужумчиси Кенан Йилдиз жамоадаги ўз ўрни ҳақида фикр билдирди. 21 ёшли футболчи «кекса синьора»нинг етакчиларидан бирига айланди. Миш-мишлар туркиялик юлдузни тез-тез Европанинг топ-клубларидан бирига ўтиши билан боғласа-да, футболчи ҳеч қаерга кетишга шошмаётганини кўп бор таъкидламоқда.
«Мен «Ювентус» тарихига ўз исмимни ёзиб қолдирмоқчиман. Келажагимни клуб билан боғлаш қарори – бу шунчаки профессионал танлов эмас, бу ерда ишонч масаласи ҳам муҳим. Менга бу ерда ўсиш учун имконият берилишини ҳис қилдим. Клуб менинг салоҳиятимга ишонди ва босқичма-босқич ривожланиш режасини тақдим этди», — деди Йилдиз «GQ» нашрига берган интервьюсида.
«Ёш ўйинчи учун ишончдан муҳимроқ нарса йўқ. «Ювентус»да мен биринчи кундан бошлаб менга ишонишаётганини ҳис қилдим», — дея қўшимча қилди у.
Эслатиб ўтамиз, Кенаннинг туринликлар билан тузган шартномаси 2030 йилгача мўлжалланган.
