«Реал» Adidas билан ҳамкорликда 2026/2027 йилги мавсум учун асосий либослар тўпламини кенг жамоатчиликка тақдим этди. Мазкур либослар концепцияси «қироллик клуби»нинг тарихий мероси ва анъаналарига бағишланган.

Либоснинг замонавий кўринишида жамоанинг устунлиги, юқори профессионализми ҳамда доимий ғалабага бўлган интилиши рамзий график чизиқлар воситасида акс эттирилган.

Мадридликларнинг анъанавий оқ рангли футболкаси ёқа ҳамда енг қисмидаги тўқ яшил элементлар билан бойитилган. Шунингдек, елка қисмидан жой олган Adidas компаниясининг анъанавий уч тасмаси эса тўқ пушти рангда ишланган.

Таъкидланишича, профессионал футболчилар учун мўлжалланган ушбу маҳсулот энг сўнгги технологиялар асосида ишлаб чиқарилган. Бу эса учрашувлар вақтида ҳаво айланишини яхшилашга ва спортчилар учун мақбул ҳароратни сақлаб туришга хизмат қилади.