Бразилия терма жамоасининг собиқ ярим ҳимоячиси Оскар 2017 йилда «Челси»дан «Шанхай Порт» клубига ўтгани ҳақида гапириб ўтди.

«Албатта, ўша пайтда у ерда жуда катта пуллар бўлганини ҳамма билади. Лекин мен у ерга бордим, чунки ўша вақтда «Челси»да ўйин амалиётига эга эмасдим. Менда Европа клубларига ўтиш имконияти ҳам, Хитой варианти ҳам бор эди. Менга жуда катта, шунчаки ҳайратланарли шартнома таклиф қилишди. Бироқ мен учун нафақат пул муҳим эди, балки янги маданият билан танишишни ҳам истагандим.

Футбол ўзгарди, ҳозир бу яққол сезилиб турибди. Неймар Саудия Арабистонига кетди, Криштиану Роналду, Карим Бензема ҳам шундай қилишди. Футболда, агар сенда жуда яхши таклиф бўлса... Бу худди иш каби, тушуняпсизми? Албатта, мен «Челси»да 20 йил ўйнашни хоҳлардим, лекин баъзан сен майдонга тушмайсан, баъзан оиланг яшаётган шаҳридан норози бўлади, баъзан эса мураббий билан келиша олмайсан.

Эҳтимол, мен яна битта Жаҳон чемпионатида ўйнашим, «Челси» учун яна кўплаб яхши ўйинлар ўтказишим мумкин эди, лекин менимча, ўшанда тўғри қарор қабул қилганман.

Агар ўша пайтда мени танқид қилганларнинг барчасига шундай таклиф тушганида, улар 100 фоиз «ҳа» деб жавоб беришган бўларди. Бу табиий ҳол, бу — иш. Фақатгина ҳиссиётларга берилмаслик керак, ўзинг учун қайси қарор тўғри эканлиги ҳақида ўйлашинг лозим», — деди Оскар.