«Милан» Рафаэл Леауни сотишга тайёр бўлган сумма маълум бўлди.

Аввалроқ вингер мавсум якунида клубни тарк этишини маълум қилган эди. Португалиялик футболчи «Арсенал»га таклиф қилингани ҳақида хабарлар тарқалди.

«Corriere dello Sport» ёзишича, «Милан» учун бу трансфердаги энг асосий масала молиявий томондир, чунки клуб фойда кўришни истамоқда. «Россонерилар» футболчини тахминан 50 миллион евро эвазига сотишга тайёр, балансда капитал ўсишини акс эттириш учун керак бўлган минимал сумма эса тахминан 11 миллион еврони ташкил қилади.

Аввалроқ Леаунинг трансфери бўйича «Фенербахче» мурожаат қилган эди, бироқ келишув олдинга силжимади. «Галатасарой» ҳам футболчига қизиқиш билдирмоқда ва яқин кунларда бу борада аниқ қадамлар ташлайди.

Қайд этилишича, Рафаэлнинг ўзи АПЛда ўйнашни истайди, аммо Испания ва Германиядан тушган таклифларни ҳам рад этмайди. Ўтган йили «Бавария» ва «Барселона» ҳам у ҳақида маълумот сўраган эди.