«Аталанта»нинг ўнг қанот ҳимоячиси Марко Палестра «Интер»га ўтишга тайёр. Инсайдер Николо Скиранинг хабар беришича, миланликлар гранди 21 ёшли футболчи билан тўлиқ оғзаки келишувга эришган: шартнома 2031 йилгача мўлжалланган бўлиб, йиллик маоши 3 миллион еврони ташкил қилади.

Иқтидорли италиялик футболчига «Манчестер Сити», «Ньюкасл» ва «Ювентус» клублари ҳам қизиқиш билдирганди. Марко Палестранинг трансфер қиймати «Transfermarkt» портали томонидан 35 миллион еврога баҳоланмоқда.

Ўтган мавсумда футболчи ижара асосида «Кальяри» сафида тўп сурган. «Интер»да латераль тез орада Мадриднинг «Реал» клубига ўтиши кутилаётган Дензел Дюмфриснинг ўрнини эгаллаши мумкин.