«Вест Хэм» клубининг қанот ҳужумчиси Крисенсио Саммервилл ёзги трансфер ойнасида кучлироқ клубга ўтиши мумкин.

«TEAMtalk» тарқатган хабарларга кўра, 24 ёшли нидерландиялик футболчи учун кечаётган курашга «Милан» ҳам қўшилган бўлиб, Италия гранди шу ёзда вингерни ўз сафига қўшиб олишга фаол ҳаракат қилмоқда. Бироқ, «россонерилар» бу йўлда «Тоттенхэм» ва «Астон Вилла» билан рақобатлашишига тўғри келади, чунки инглиз клублари ҳанузгача Саммервиллга қизиқиш билдирмоқда.

«Вест Хэм» Премьер-лигадан тушиб кетганидан сўнг, клуб футболчини тахминан 40 миллион евро эвазига қўйиб юбориши кутилмоқда. Шу сабабли, Саммервиллнинг бошқа жамоага ўтиши кун сайин ҳақиқатга айланиб бормоқда.

Ортда қолган мавсумда ҳужумчи барча мусобақаларда жами 34 та учрашувда майдонга тушиб, ўз ҳисобига 7 та гол ва 5 та голли узатмани ёздириб қўйди.