«Ливерпуль» клуби янги бош мураббий масаласида бир қарорга келди — бу лавозимни Андони Ираола эгаллади. Испаниялик мутахассиснинг тайинлангани ҳақида пайшанба куни расман эълон қилинди.
Журналист Энди Хантернинг сўзларига кўра, мерсисайдликлар раҳбарияти 43 ёшли мутахассисни мавжуд номзодлар ичида энг яхшиларидан бири деб ҳисоблаган. Тахминларга кўра, «Борнмут»нинг собиқ устози Арне Слот даврида амалга ошмай қолган ғоя ва режаларни ҳаётга татбиқ этиш учун идеал тарзда мос келади.
«Ливерпуль» вакилларини «олчалар»нинг Ираола қўл остида кўрсатган натижалари ҳайратда қолдирган: жамоа мунтазам равишда кутилганидан яхшироқ натижа қайд этган ва ресурслар борасида ўзидан анча устун бўлган рақибларни ортда қолдириб келган. Буларнинг барчасига агрессив юқори прессингга асосланган ўйин услуби орқали эришилган ва бу жиҳат ҳам «қизиллар»ни ўзига жалб қилган.
Андонининг яна бир муҳим устунлиги — футболчиларни индивидуал тарзда ривожлантира олиш қобилиятидир. «Борнмут»нинг сўнгги йиллардаги бир қатор йирик трансфер сотувлари ҳам айнан шундан далолат беради.
