«ПСЖ» ва Франция терма жамоаси чап қанот ҳимоячиси Люка Эрнандес Жаҳон чемпионати олдидан ўз кайфияти (иштиёқи) ҳақида гапириб берди. 30 ёшли футболчи «учранглилар»нинг мундиал учун қайдномасидан жой олган. Дидье Дешам шогирдлари гуруҳ босқичида Сенегал, Ироқ ва Норвегия терма жамоаларига қарши баҳс олиб боришади.

«Ҳозирги кайфият? Орқада «ПСЖ» билан тарихга кирган ақл бовар қилмас мавсум қолди, бироқ бу аллақачон ўтмиш. Энди бор эътибор терма жамоага қаратилган. Биз доимо ғалабаларга чанқоқмиз, ҳеч қачон эришилган натижалар билан тўхтаб қолмаймиз. Тайёргарлик давом этмоқда, ҳали айрим жиҳатларни яхшилашимиз керак. Жаҳон чемпионати — ҳамма учун алоҳида аҳамиятга эга воқеликдир. Биз мухлисларимизга фахрланишлари учун сабаб тақдим этмоқчимиз», — дея Франция ОАВлари Эрнандеснинг сўзларини келтирмоқда.

Пайшанба куни Франция терма жамоаси ўртоқлик учрашувида Кот-д’Ивуар вакилларига имкониятни бой бериб қўйди (1:2).