Мадриднинг «Реал» клуби президентлигига номзод Энрике Рикельме ҳужумчи Эрлинг Холанднинг жамоага эҳтимолий трансфери ҳақида фикр билдирди.

Эслатиб ўтамиз, аввалроқ «Манчестер Сити» клуби расмий баёнот билан чиқиб, футболчининг Испания клубига ўтиш имкониятини мутлақо рад этган эди.

«Тўлиқ ишонч билан айтаман: агар мен президент бўлсам, Холанд «Реал»да ўйнайди», — дея Рикельменинг сўзларидан иқтибос келтиради Marca нашри.

Рикельме, шунингдек, «Манчестер Сити» томонидан берилган раддиядан хафа эмаслигини ҳам таъкидлаб ўтди.

«Бу табиий ҳол. Улар ўз футболчисини ҳимоя қилишлари керак. Мен буни тушунаман ва шахсий адоват сифатида қабул қилмайман. Бу футбол оламининг бир қисми. Мен «Сити»ни ҳурмат қиламан ва душанбадан кейин улар билан музокаралар столига ўтиришга тайёрман».

Бундан ташқари, Рикельме 2000 йилда португалиялик футболчи Луиш Фигунинг «Реал»га ўтганини ёдга олди. Ўшанда футболчи барча оммавий ахборот воситаларида ҳеч қаерга кетмаслигини таъкидлаган эди.

Маълумот учун, «Реал»нинг янги президентини сайлаш жараёни 7 июнь куни бўлиб ўтади.