«Байер» ҳимоячиси Алехандро Гримальдо шу ёзда Испания Ла Лигасига кўчиб ўтиши мумкин.

Таниқли журналист Маттео Мореттонинг хабар беришича, 30 ёшли футболчига Мадриднинг «Атлетико» ва Каталониянинг «Барселона» клублари қизиқиш билдирмоқда. Шу билан бирга, ўйинчининг ўзи ҳам ватанида тўп тепиш истагини яширмаяпти.

Маълум қилинишича, Леверкузен клуби ҳимоячини сотиш вариантларини кўриб чиқишга тайёр. Эҳтимолий трансфер суммаси тахминан 10 миллион еврони ташкил қилиши мумкин. Айни дамда томонлар ўртасида ҳали расмий ва аниқ музокаралар бошлангани йўқ.

Эслатиб ўтамиз, футболчи илгари «Барселона»нинг иккинчи жамоасида (Барселона Б) фаолият юритган бўлиб, у ерда 90 дан ортиқ учрашувда майдонга тушган.