Мадриднинг «Реал» клуби собиқ дарвозабони Икер Касильяс клубда бўлажак президентлик сайловлари атрофидаги шов-шувлар борасида ўз фикрини билдирди. Овоз бериш жараёни 7 июнь куни бўлиб ўтади.
Marca порталининг «Реал»га келиши мумкин бўлган шахслар, жумладан, Жозе Моуриньо ва Эрлинг Холанд ҳақидаги саволига Касильяс қуйидагича жавоб қайтарди:
«Якунда буларнинг барчасидан биз — ютамиз. Клуб фаровонлиги йўлида ҳамма нарсани тўғри бажаришни хоҳлайдиган номзодларнинг борлиги — жуда яхши. Кейин эса ҳар ким ўзи маъқул деб билган номзодга овоз беради. Бу каби номларнинг тилга олиниши фақат қувонтиради.
Холанд Мбаппе ва Винисиус билан бир жамоада тил топишиб кета оладими? Билмадим, бу жуда қизиқ бўларди. Кўрамиз, якшанба куни нима бўларкин. Ким келишидан қатъи назар, асосийси — бу Мадрид учун энг яхшиси бўлиши керак».
Бўлажак сайловларда Касильяс узоқ йиллардан бери клубнинг амалдаги раҳбари Флорентино Пересга биринчи марта рақобатчи бўлаётган Энрике Рикельме жамоаси вакили сифатида иштирок этмоқда.
