Нидерландия терма жамоасининг юлдузли ҳимоячиси Виржил ван Дейк Жаҳон чемпионати — 2026 якунланганидан сўнг миллий жамоани тарк этиши мумкинлиги ҳақида гапирди.

«Бу Жаҳон чемпионати Нидерландия терма жамоаси сафидаги сўнгги турнирим бўладими? Ҳозирча бир нима дея олмайман. Бу ҳақда мундиал тугаганидан кейин ўйлаб кўраман. Умид қиламанки, бу қарорни қўлимда Жаҳон кубогини ушлаган ҳолда қабул қиламан», — дея ҳимоячининг сўзларини келтиради NU нашри.

Эслатиб ўтамиз, Жаҳон чемпионати АҚШ, Канада ва Мексика майдонларида 11 июндан 19 июлгача бўлиб ўтади. Нидерландия терма жамоаси турнирнинг гуруҳ босқичида Тунис, Швеция ва Япония миллий терма жамоаларига қарши баҳс олиб боради. Мусобақанинг амалдаги ғолиби Аргентина ҳисобланади.