«Ювентус» клуби ҳужумчи Кенан Йилдизни ўз сафида олиб қолиш борасида қатъий қарорга келган. 21 ёшли футболчи яқин келажакда Турин клубини тарк этиши кутилмаяпти.

Журналист Николо Скиранинг маълумотларига кўра, айни дамда «кекса синьора» раҳбарияти туркиялик футболчини сотиш имкониятини бутунлай инкор этмоқда. «Ювентус» ҳатто 80-90 миллион евро миқдорида таклиф тушган тақдирда ҳам, трансфер бўйича музокаралар олиб бормайди.

Кенан Йилдиз шу йилнинг февраль ойида «бьянконерилар» билан шартномасини узайтирган эди — янги келишув 2030 йилгача мўлжалланган. Якунланган мавсумда ҳужумчи 47 та учрашувда майдонга тушиб, 11 та гол урди ва 10 та голли узатмани амалга оширди.