Англия терма жамоаси бош мураббийи Томас Тухель жамоа ҳужумчиси Харри Кейн ҳақида ўз фикрларини билдирди. «Бавария» шарафини ҳимоя қилувчи футболчи мавсум давомида 61 та гол урди ва Жаҳон чемпионатига аъло даражадаги спорт формасида етиб келди.

Англия терма жамоаси турнирга тайёргарликни 6 июнь куни бўлиб ўтадиган Янги Зеландияга қарши ўртоқлик учрашуви билан бошлайди. Ушбу баҳсда Кейнга 45 дақиқадан кўп бўлмаган ўйин вақти берилиши кутилмоқда, бироқ бу форвард жамоанинг асосий фигураси эмаслигини англатмайди:

«У ажойиб спорт формасида. Охирги ҳимоявий машғулотларда Кейн юқори шиддатни белгилаб берди. У тайёр. Июнь ойида ҳаво иссиқ бўлса ҳам, у учун умуман хавотир олишга ҳожат йўқ. У бизнинг етакчимиз, «Бавария»да юқори прессингга ва рақиб майдончасидаги шиддатли ўйинларга кўникиб қолган. У ҳаммага ўрнак бўлмоқда. Менимча, у ўз фаолиятидаги энг яхши спорт формасида турибди», — дея The Mirror нашри мураббийнинг сўзларини келтиради.

«Биз ундан имкон қадар тез-тез фойдаланишга ҳаракат қиламиз, шу билан бирга унинг соғлиғини ҳам сақлаб қолишни истаймиз. Умид қиламизки, бизда уни ҳар бир ўйинда 90 ёки 120 дақиқа давомида майдонда ушлаб турмаслик имконияти бўлади», — дея қўшимча қилди Тухель.

Эслатиб ўтамиз, Жаҳон чемпионатининг гуруҳ босқичида Англия терма жамоаси Хорватия, Гана ва Панамага қарши майдонга тушади.