«Барселона» ярим ҳимоячиси Марк Касадонинг «Монако» клубига ўтиши номаълум муддатга тўхтатиб қўйилди. Бу ҳақда журналист Микель Бласкес хабар бермоқда.

Манбанинг берган маълумотларига кўра, 22 ёшли хавбекнинг «Монако»га трансфери тўлиқ келишиб бўлинган эди, бироқ унинг агенти Жорже Мендеш келишувни тўхтатиб қолган. Қайд этилишича, Мендеш Жоау Канселу иштирокидаги эҳтимолий трансфер занжири доирасида Касадони Саудиянинг «Ал-Ҳилол» клубига таклиф қилишни режалаштирмоқда.

Шу билан бирга, Касадонинг «Монако»га ўтиш варианти ҳали бутунлай кун тартибидан тушиб қолгани йўқ, чунки футболчининг ўзи фаолиятини Европада давом эттиришни истамоқда. Бошқа томондан эса, «Ал-Ҳилол»нинг сахий молиявий таклифи унинг бу позициясини ўзгартириб юбориши мумкин. Испаниялик футболчи маълум муддат Саудия Арабистонида тўп суриб, кейинчалик яна Европага қайтиш вариантини ҳам кўриб чиқиши мумкин.

Якунланган мавсумда Касадо барча турнирларда 34 та ўйинда майдонга тушиб, ўз ҳисобига битта голли узатмани ёздириб қўйган эди.