Мюнхеннинг «Бавария» клуби вингери Майкл Олисе Мадриднинг «Реал» клубига ўтишга тайёр. Бу ҳақда испаниялик журналист Рамон Альварес де Мон маълум қилди.

«Олисе «Реал» унга қизиқиш билдираётганидан хабардор. Такрорлайман, тўғридан-тўғрими ёки билвосита, воситачилар орқалими — бунисини билмайман, лекин у бундан хабардор. Ва Олисе «Реал»га ўтиш ғоясига очиқ», — деб ёзди Альварес ўзининг ижтимоий тармоқлардаги саҳифасида.

Яқинда матбуотда «қаймоқранглилар» франциялик футболчи учун 150 миллион евро таклиф қилиш ниятида экани ҳақида хабарлар тарқалган эди.

Ўтган мавсумда 24 ёшли Олисе барча турнирларда 52 та учрашувда майдонга тушиб, 22 та гол ва 31 та голли узатмани ўз ҳисобига ёздириб қўйди. «Бавария» вингери Бундеслиганинг энг яхши футболчиси деб топилди.