«Ноттингем Форест» клубининг ҳужумкор ярим ҳимоячиси Морган Гиббс-Уайт «Манчестер Юнайтед» эътиборига тушди. «Қизил иблислар» «ўрмончилар»нинг 26 ёшли юлдузи атрофидаги вазиятни диққат билан кузатиб боришмоқда, дея хабар бермоқда Daily Mail.

Манбанинг таъкидлашича, «Ноттингем Форест» футболчини камида яна бир йил ўз сафида сақлаб қолмоқчи, бироқ унинг шу ёзда «Юнайтед»га ўтишини ҳам истисно қилиб бўлмайди.

Transfermarkt портали Гиббс-Уайтнинг трансфер баҳосини 70 миллион еврога баҳоламоқда. Якунланган мавсумда хавбек барча турнирларда 53 та ўйинда майдонга тушиб, ўз ҳисобига 18 та гол ва 7 та голли узатмани ёздириб қўйди. Англиялик футболчининг «Форест» билан амалдаги шартномаси 2028 йилгача мўлжалланган.