«Ювентус» клуби «Астон Вилла» дарвозабони Эмилиано Мартинесни ўз сафига қўшиб олиш устида ишлашда давом этмоқда. Аргентиналик посбон шу ёзда клубини ўзгартириш ниятида ва «кекса синьора» унга асосий даъвогарлардан бири бўлиб турибди.
Журналист Николо Скиранинг маълумотларига кўра, яқин орада «бьянконери» вакиллари 33 ёшли дарвозабоннинг агенти билан янги музокаралар босқичини ўтказишади. Бош мураббий Лучано Спаллетти Мартинесни ўз жамоасида кўришни истамоқда, бироқ жаҳон чемпионининг юқори маоши бу трансферга жиддий тўсиқ бўлиб қолмоқда.
Transfermarkt портали Эмилиано Мартинеснинг трансфер қийматини 12 миллион еврога баҳолаган. Футболчининг «Астон Вилла» билан амалдаги шартномаси 2029 йилгача мўлжалланган.
