Лондоннинг «Арсенал» клуби марказий ҳимоячиси Вильям Салиба жамоанинг ўйин услуби ҳақида гапирди. «Канонирлар» охирги 22 йил ичида илк бор Премьер-лига чемпионлигини қўлга киритишди. Бутун чемпионлик мавсуми давомида Микель Артета шогирдлари стандарт вазиятларга асосланган ҳаддан ташқари прагматик услуби учун танқид қилинди.
«Мен келган илк мавсумда биз ақл бовар қилмас футбол ўйнагандик. Титулни ютишга лойиқмиз деб ҳисоблагандим, лекин якунда иккинчи бўлдик. Кейинги мавсумда яна иккинчи ўринни олганимизда ҳам устимиздан кулишди. Бу мавсумда эса бошқачароқ ўйнадик, бироқ мен танқидларга қўшилмайман. Ҳа, биз стандартлардан анча кўп гол уряпмиз, лекин бутун лига ўзгарди: ҳозир ҳамма аутлар ва бурчак тўпларига урғу бермоқда — биз шунчаки бу ишни бошқалардан кўра яхшироқ уддаладик. Буни худди шу руҳда давом эттирамиз», — деди Салиба L'Equipe нашрига берган интервьюсида.
«Арсенал» АПЛнинг 2025/26 йилги мавсуми якуний турнир жадвалида «Манчестер Сити»ни 7 очкога ортда қолдириб кетди.
