Ҳимоячи Кристиан Ромеро шу ёзда «Тоттенхэм»ни тарк этиши мумкин. Fichajes нашрининг берган маълумотларига кўра, «Манчестер Юнайтед» футболчини ўз сафига қўшиб олишга қизиқиш билдирмоқда.

«Қизил иблислар» аргентиналик ҳимоячининг трансфери учун 65 миллион евро тўлашга тайёр. Манчестер клуби ҳимоя чизиғини кучайтириш ниятида ва Ромеро ўзининг етакчилик фазилатлари ҳамда тажрибаси туфайли клубнинг устувор трансфер мақсади бўлиб турибди.

Кристиан Ромеро 2022 йилда «Аталанта»дан «Тоттенхэм»га 53 миллион евро эвазига ўтган эди. Унинг лондонликлар билан шартномаси 2029 йилнинг 30 июнига қадар мўлжалланган. 2025/26 йилги мавсумда аргентиналик футболчи «шпорлар» сафида барча мусобақаларда 32 та ўйинда майдонга тушиб, 6 та гол урди ва 4 та голли узатмани амалга оширди.