Мюнхеннинг «Бавария» клуби «Манчестер Юнайтед» ҳужумчиси Маркус Рэшфорднинг трансфери учун сўралаётган маблағни тўлашга тайёрлигини билдирди.

Football365 нашрининг хабарига кўра, айни дамда бу трансфер ноаниқ вазиятда турибди. Сабаби, кўп нарса Рэшфорд ўтган мавсумни ижарада ўтказган «Барселона» клубининг қарорига боғлиқ. Каталонияликлар футболчини 30 миллион еврога сотиб олиш ҳуқуқига эга, бироқ ҳозирча бу бандни фаоллаштириш ниятида эмаслар. «Барселона» муқобил вариантларни — янги ижара шартномасини ёки трансфер нархини пасайтиришни кўриб чиқмоқда.

Испания клубининг қарорини кутаётган «Манчестер Юнайтед» эса бошқа жамоаларнинг таклифларини эшитишга тайёрлигини маълум қилди. Бундан унумли фойдаланган «Бавария» сўралаётган суммани тўлашга рози бўлди. Ушбу потенциал трансфернинг асосий муаммоси — футболчининг ҳафтасига 346 минг еврони ташкил этувчи юқори маоши бўлиб қолмоқда.