ESPN нашри 2026 йилги жаҳон чемпионатида иштирок этадиган энг кучли 50 та футболчининг рейтингини чоп этди. Бу рўйхат ўйинчиларнинг сўнгги мавсумлардаги клуб миқёсидаги спорт формаси ва жамоа натижаларига кўрсатган умумий таъсири асосида тузилган.

Мақола муаллифининг таъкидлашича, ушбу рейтинг турнирдаги натижалар тахмини эмас, балки жаҳон чемпионати старти олдидан футболчиларнинг айни пайтдаги даражасини акс эттиради. Ўйинчилар шартли равишда еттита тоифага ажратилган — «ғолиб жамоаларнинг потенциал юлдузлари»дан тортиб, элита даражасидаги иккинчи план вакиллари ва универсал етакчиларгача.

Рейтингни Франция терма жамоаси аъзоси Усмон Дембеле бошқариб турибди. Иккинчи ўринни Испания терма жамоасидан Ламин Ямаль эгаллаган бўлса, кучли учликни яна бир француз — Майкл Олисе якунлаб берган.

Шунингдек, кучли ўнликдан (Топ-10) қуйидаги футболчилар жой олди:

• Харри Кейн (Англия)

• Бруну Фернандеш (Португалия)

• Педри (Испания)

• Вильям Салиба (Франция)

• Рафинья Диас (Бразилия)

• Букайо Сака (Англия)

• Мартин Эдегор (Норвегия)

Дембеленинг биринчи ўринга лойиқ кўрилишига унинг универсаллиги, ҳар икки оёқда бирдек яхши ўйнаши, мураббий Луис Энрике қўл остида прессинг борасида ўсишга эришгани ва «ПСЖ» ўйинига кўрсатаётган катта таъсири сабаб бўлгани алоҳида қайд этилган.

Килиан Мбаппе (Франция), Эрлинг Холанд (Норвегия), Лионель Месси (Аргентина) ва Жуд Беллингем (Англия) эса иккинчи тоифага киритилди. Муаллифнинг фикрича, ушбу тоифадаги футболчиларни идеал жамоавий тузилмага мослаштириш бироз мураккаб ҳисобланади.