«Манчестер Юнайтед» ва «Челси» клублари «Барселона» ярим ҳимоячиси Марк Касадога қизиқиш билдирмоқда. Бу ҳақда TEAMtalk нашри хабар бермоқда.

Манбанинг маълум қилишича, «қизил иблислар» вакиллари яқинда 22 ёшли футболчи бўйича музокараларга киришган. «Кўклар» эса ўз навбатида ўйинчи атрофидаги вазиятни кузатиб боришмоқда, бироқ трансфер амалга ошган тақдирда унга асосий таркибдан доимий жой кафолатлай олмайдилар.

Қайд этилишича, айни пайтда АПЛ клубларининг ҳеч бири расмий таклиф билан чиқмаган. Бу борада испаниялик футболчини сотиб олиш учун асосий фаворит сифатида ҳамон «Монако» кўрилмоқда. Касадо шу ёзда «кўк-анорранглилар» сафини тарк этиши тахмин қилинмоқда, чунки клуб янги харидлар учун қайдномадан жой бўшатиш ниятида.

Футболчи 2024 йилнинг июль ойидан буён Каталония клубининг асосий таркибида тўп суриб келмоқда. Унинг амалдаги шартномаси 2028 йилнинг 30 июнига қадар мўлжалланган. Якунланган мавсумда Касадо 34 та учрашувда майдонга тушиб, 1 та голли узатмани амалга оширди. Transfermarkt портали маълумотларига кўра, футболчининг тахминий баҳоси 18 миллион еврони ташкил этади.