«Рома» клуби «Марсель» ҳужумчиси Мэйсон Гринвуд учун курашда олдинга чиқиб олди ва футболчи билан шахсий шартнома шартларини келишувга эришди. Бу ҳақда «Goal» портали хабар бермоқда.

Ҳужумчининг бошланғич соф маоши йилига тахминан 4 миллион еврони ташкил қилади, шунингдек, шартномада қайд этилган натижалар учун бонуслар ҳам кўзда тутилган. Бироқ, клублар ҳозирча трансфер суммаси бўйича бир қарорга келишгани йўқ.

УЕФАнинг молиявий қоидаларига риоя қилишда қийинчиликларга дуч келаётган «Марсель» футболчини тахминан 55 миллион еврога баҳоламоқда, «Рома» эса тахминан 40 миллион евро атрофида илк расмий таклифини тайёрламоқда.

Аввалроқ, футболчига асосий даъвогар сифатида «Фенербахче» кўрилаётган эди, бироқ Туркия клубида бўлиб ўтган президентлик сайловларидан сўнг туркларнинг унга бўлган қизиқиши амалда йўққа чиқди.