«Герта» клуби ярим ҳимоячиси Кеннет Айхгорн ёзги трансфер ойнасида жамоасини ўзгартиришга яқин турибди. Kicker нашрининг хабарига кўра, 16 ёшли иқтидорли футболчи учун асосий кураш «Байер» ва «РБ Лейпциг» клублари ўртасида кечмоқда. Бунда Леверкузен клуби ўйинчини қўлга киритиш борасида фаворит ҳисобланмоқда.
Маълум қилинишича, Айхгорннинг вакиллари унга қизиқиш билдираётган барча жамоалар билан музокаралар ўтказишган ва узоқ вақт давомида «Байер»га янги бош мураббий тайинланишини кутишган. Манбанинг қайд этишича, ушбу ҳолат футболчининг Леверкузенга кўчиб ўтишга жиддий қизиқаётганидан далолат бериши мумкин.
Аввалроқ матбуотда ушбу иқтидорли футболчига Англиянинг «Ливерпуль» клуби ҳам қизиқиш билдираётгани ҳақида хабарлар тарқалган эди.
