«Атлетико» раҳбари Энрике Сересо Мадриднинг «Реал» клуби томонидан ҳужумчи Хулиан Альварес учун қилинган расмий таклиф ҳақида гапирди. «Қаймоқранглилар» матбуот хизмати хабар беришича, «матрасчилар» аргентиналик футболчи учун берилган 150 миллион евролик таклифни рад этишган.

«Реал»нинг таклифи? Альварес сотилмайди. Биз уни сотишни истамаймиз», — дея Сересонинг El Chiringuito TV билан суҳбатдаги сўзларини келтирмоқда манба.

Аввалроқ «Атлетико» Хулиан Альваресни «Барселона»га ҳам қўйиб юбормаган эди. Якунланган мавсумда 26 ёшли футболчи Диего Симеоне жамоаси сафида барча турнирларда 49 та учрашувда майдонга тушиб, 20 та гол ва 9 та голли узатмани ўз ҳисобига ёздириб қўйди. Ҳужумчининг амалдаги шартномаси 2030 йилгача мўлжалланган.