Франциялик фахрий футболчи Оливье Жиру «Лилль» билан шартномасини узайтиргани ҳақида аввалроқ хабар берган эдик. Унинг бу қарорга келишидаги асосий омиллардан бири клубнинг кейинги мавсумда Чемпионлар лигасида иштирок этиши бўлди. «Лилль» якунланган мавсумни муваффақиятли ўтказиб, ушбу ҳуқуқни қўлга киритган эди.

«Чемпионлар лигаси — бу энг юқори даража. Шартномани узайтиришимда ушбу сабаб ҳам муҳим рол ўйнади, чунки «Лилль» у ерда ўйнайди. Мен ушбу турнирда жамоага яна нимадир бера олишимни ҳис қиляпман. Менда мотивация юқори», — дея Жирунинг сўзларидан иқтибос келтирмоқда pianetamilan.it нашри.

Эслатиб ўтамиз, тажрибали футболчи фаолияти давомида Италиянинг «Милан» ва Англиянинг «Арсенал» каби клублари шарафини ҳимоя қилган.