«Челси» ва Испания терма жамоаси чап қанот ҳимоячиси Марк Кукурелья бўлажак Жаҳон чемпионатидан нималар кутаётгани билан ўртоқлашди.
Амалдаги Европа чемпионлари мундиалда Кабо-Верде, Уругвай ва Саудия Арабистони билан бир гуруҳдан жой олган.
«Бу менинг биринчи Жаҳон чемпионатим, турнир бошланишини интиқлик билан кутяпман ва ундан завқ олмоқчиман. Умид қиламанки, биз ўзимизнинг энг яхши футболимизни кўрсата оламиз — агар шундай бўлса, нима учун ҳал қилувчи босқичларгача етиб бормаслигимиз керак? Мақсад сари қадамма-қадам ҳаракат қилиш лозим. Кўрамиз, бундан нима чиқар экан», — дея 27 ёшли футболчининг сўзларини келтиради «Челси» матбуот хизмати.
Гуруҳ босқичининг илк турида «қизил фурия» Кабо-Верде терма жамоаси билан тўқнаш келади — баҳс 15 июнь куни бўлиб ўтади.
