Бильбаонинг «Атлетик» клуби қанот ҳужумчиси Нико Уильямс фаолиятини «Манчестер Юнайтед»да давом эттириши мумкин. Бу ҳақда ElNacional нашри хабар бермоқда.

Манбанинг маълум қилишича, «қизил иблислар» 23 ёшли вингернинг ҳаракатларини фаол кузатиб боришмоқда. Бироқ инглиз клуби айни дамда футболчининг шартномасида кўрсатилган 100 миллион евролик товон пулини тўлашга тайёр эмас.

«Манчестер Юнайтед» раҳбарияти анчадан бери Нико Уильямс ўйинига қизиқиш билдириб келади, аммо жорий ёзги трансфер ойнасида клуб асосий эътиборни ярим ҳимоя чизиғини кучайтиришга қаратган. Бу трансфернинг амалга ошиши кўп жиҳатдан манкунианликларнинг ўз футболчиларини сотиш орқали қанча маблағ ишлаб топа олишига боғлиқ бўлади.

Қайд этилишича, испаниялик иқтидор эгаси учун АПЛнинг бошқа грандлари — «Арсенал» ва «Ливерпуль» клублари ҳам жиддий кураш олиб бормоқда.

Маълумот учун, якунланган мавсумда Нико Уильямс барча мусобақаларда 32 та учрашувда майдонга тушиб, ўз ҳисобига 6 та гол ва 7 та голли узатма ёздириб қўйган.