«Уиган» клуби ярим ҳимоячиси Харрисон Беттони фаолиятини Англиянинг топ-клубида давом эттириши мумкин. Бу ҳақда Football Insider нашри хабар бермоқда.

Манбанинг берган маълумотларига кўра, 18 ёшли футболчининг трансферига Лондоннинг «Челси» клуби жиддий қизиқиш билдирган. «Аристократлар» амалдаги шартномаси шу йилнинг 30 июнь куни якунига етадиган ёш иқтидор учун кечган курашда рақибларини ортда қолдиришга муваффақ бўлган. «Кўклар» раҳбарияти Беттонини минимал даражадаги компенсация эвазига қўлга киритиш учун барча чораларни кўриб бўлган.

Харрисон Беттони Англиянинг учинчи кучли дивизиони ҳисобланган Биринчи лигада мавсумни 16-ўринда якунлаган «Уиган» клуби тарбияланувчиси ҳисобланади.

Универсал футболчи асосан ҳужумкор ярим ҳимоячи позициясида тўп суради, бироқ зарурат туғилганда ҳужумнинг ўнг қанотида ёки марказий форвард сифатида ҳам ҳаракат қила олади. Беттони якунланган 2025/26 йилги мавсумда «Уиган» таркибида барча турнирларда 27 та ўйинда майдонга тушиб, ўз ҳисобига 4 та гол ёздириб қўйган.