Миланнинг «Интер» клуби ҳимоячиси Дензел Дюмфрис шу ёзда жамоани тарк этади — нидерландиялик футболчи фаолиятини Мадриднинг «Реал» клубида давом эттиради. Бу ҳақда таниқли журналист Саймон Филлипс хабар бермоқда.
Манбанинг берган маълумотларига кўра, Милан клуби раҳбарияти аллақачон Дюмфриснинг ўрнини боса оладиган футболчи қидиришни бошлаб юборган. Италянлар нидерландиялик ҳимоячига ўринбосар сифатида Лондоннинг «Челси» клуби вакили Мало Гюсто номзодини кўриб чиқмоқда. Франциялик ёш ҳимоячи «Интер»нинг трансфер рўйхатидаги асосий номзодлардан бири бўлиб турибди.
Маълумот учун, Мало Гюсто 2023 йилда Франциянинг «Лион» клубидан 30 миллион евро эвазига «Челси»га ўтган эди. Унинг «аристократлар» билан амалдаги шартномаси 2030 йилнинг 30 июнига қадар мўлжалланган.
Франциялик ҳимоячи якунланган 2025/26 йилги мавсумда лондонликлар сафида барча мусобақаларда 49 та ўйинда майдонга тушиб, 3 та гол урди ва 5 та голли узатмани амалга оширди. Нуфузли Transfermarkt портали Гюстонинг трансфер баҳосини 35 миллион еврога баҳоламоқда.
