Туриннинг «Ювентус» клуби ярим ҳимоячиси Кефрен Тюрам шу ёзги трансфер ойнасида жамосини ўзгартириши мумкин. Бу ҳақда таниқли журналист Мирко Ди Натале хабар бермоқда.

Манбанинг берган маълумотларига кўра, франциялик иқтидорли футболчига аввалроқ хабар берилганидек, фақатгина Туркиянинг «Галатасарой» клуби қизиқиш билдираётгани йўқ. Эндиликда Англия Премьер-лигаси грандлари — «Манчестер Юнайтед» ва «Ливерпуль» клублари ҳам футболчи учун курашга киришган.

Маълумот учун, Кефрен Тюрам 2024 йилда Франциянинг «Ницца» клубидан 20 миллион евро эвазига «Ювентус» сафига келиб қўшилган эди. Унинг Турин клуби билан амалдаги шартномаси 2029 йилнинг 30 июнига қадар мўлжалланган.

25 ёшли марказий ярим ҳимоячи якунланган 2025/26 йилги мавсумда «бьянконери» таркибида барча мусобақаларда 45 та ўйинда майдонга тушиб, ўз ҳисобига 4 та гол ва 5 та голли узатма ёздириб қўйди. Нуфузли Transfermarkt портали айни дамда Тюрамнинг трансфер қийматини 38 миллион еврога баҳоламоқда.