Халқаро шахмат федерацияси (FIDE) кенгаши Россия шахмат федерациясининг (РШФ) ташкилотдаги аъзолигини вақтинча тўхтатиш бўйича қарор қабул қилди. Бу ҳақда ташкилотнинг расмий сайтида маълум қилинган. Ушбу қарор Россия томони Спорт арбитраж суди ( CAS) талабларини белгиланган муддатда бажармагани ортидан қабул қилинган.

Гап 2024-йилдан бери давом этиб келаётган можаро ҳақида бормоқда. Ўшанда Украина шахмат федерацияси Россия ташкилотини Украинанинг босиб олинган ҳудудларида фаолият юритаётганликда айблаб, шикоят киритган эди. Натижада FIDE русларни икки йилга четлатган, бироқ кейинчалик апелляция ортидан бу жазо 45 минг евролик жаримага ўзгартирилган.

Бунга жавобан Украина томони CAS’га мурожаат қилди. Суд Россия федерациясининг хатти-ҳаракатлари Украинанинг ҳудудий яхлитлигига хавф туғдираётганини ва FIDE низомига мутлақо зид эканини тасдиқлади.

Шунингдек, суд жарима тарзидаги жазони етарли эмас деб топиб, Россиядан 90 кун ичида босиб олинган ҳудудлардаги фаолиятини тўхтатишни талаб қилди. Агар ушбу талаб бажарилмаса, РШФ уч йилгача аъзоликдан маҳрум қилиниши белгиланганди. CAS қарорини ижро этишнинг сўнгги муддати 9 июнь куни якунига етди ва бу ҳолат аъзоликнинг тўхтатилишига олиб келди.

FIDE ўз баёнотида жорий этилган санкциялар фақат Россия шахмат федерациясининг ташкилий фаолиятига тегишли эканини алоҳида таъкидлаган. Яъни, бу чекловлар россиялик шахматчиларнинг халқаро мусобақалардаги шахсий иштирокига тўсқинлик қилмайди.