The Athletic нашри «Реал» қайси мураббийлар номзодини кўриб чиққани ҳақида маълум қилди.

Бугун мадридликлар Жозе Моуринью бош мураббий этиб тайинланганини эълон қилишди. Шартнома уч йилга мўлжалланган.

Эҳтимолий вариантлардан бири сифатида Маурисио Почеттино (АҚШ терма жамоаси) номзоди кўриб чиқилган, бироқ у билан ҳеч қандай музокаралар олиб борилмаган. Шунингдек, Дидье Дешам (Франция терма жамоаси) ва Унаи Эмери («Астон Вилла») номлари ҳам тилга олинган — охирги вариант «Реал» президенти Флорентино Пересга маъқул келмаган.

Бундан ташқари, «Реал» директори Сантьяго Солари орқали Аргентина терма жамоаси бош мураббийи Лионель Скалони билан боғланишга эҳтиёткорона уриниш қилинган. Клубнинг Пересга яқин бўлган манбаси ўша пайтда «мураббийни президентнинг ўзи танлаши керак» деб айтган ва Флорентинонинг танлови «келиб чиқадиган барча оқибатлар билан бирга қўллаб-қувватланишини» ҳамда 79 ёшли президентнинг «жуда аниқ режаси» борлигини таъкидлаган эди. Кейинчалик маълум бўлишича, бу режа Моуриньюни қайтаришдан иборат бўлган.