“Астон Вилла”нинг ҳужумкор ярим ҳимоячиси Морган Рожерс ҳали ўз келажаги борасида бир қарорга келмади. 23 ёшли футболчига бир қатор грандлар қизиқиш билдираётгани анчадан бери айтиб келинади, бироқ айни пайтда инглиз футболчиси фақат иккита вариантни жиддий кўриб чиқмоқда. Гап Лондоннинг “Арсенал” клуби ва “Бавария” ҳақида кетмоқда, деб хабар беради журналист Стив Кей.

Футболчининг вакиллари аллақачон ҳар иккала клуб билан музокаралар ўтказишган. “Астон Вилла” Морган Рожерс учун тахминан 100 миллион фунт стерлинг (бу деярли 116 миллион еврога тенг) талаб қилмоқда. Хавбекнинг “виллаликлар” билан амалдаги шартномаси 2031 йилгача мўлжалланган, унинг трансфер бозоридаги нархи эса, Transfermarkt талқинига кўра, 90 миллион еврони ташкил этади.