Франция терма жамоаси ҳужумчиси Килиан Мбаппе жамоадоши Майкл Олисе ҳақида ўз фикри билан ўртоқлашди. “Бавария” вингери Мадриднинг “Реал” клуби форварди қаторида Франция миллий терма жамоасининг бош юлдузларидан бири ҳисобланади.
“Олисе — бу бизнинг бугунимиз ва келажагимиз. Унда нафислик ва ўйинни тушуниш қобилияти бор. Биз у билан жуда яхши чиқишамиз. Ҳозир у француз тилида яхши гапиради, лекин сиз, журналистлар, буни пайқамайсиз, чунки у сизлар билан кам мулоқот қилади. Унинг характери шундай”, — дея Мбаппенинг сўзларини Madrid Universal нашри келтиради.
“Уч ранглилар” Жаҳон чемпионати гуруҳ босқичининг 1-тури доирасида Сенегалга қарши баҳс олиб боришади.
