Босния ва Герцеговина терма жамоаси Жаҳон чемпионати гуруҳ босқичининг 1-турида Канада билан дуранг (1:1) ўйнади. Боснияликлар бош мураббийи Сергей Барбарез ушбу натижани адолатли деб ҳисоблашини айтди.

“Ғалаба қозона олмаганингда доим афсус бўлади. Лекин реалист бўлишимиз керак, бизга бироз омад ҳам кулди. Менимча, 1:1 — ҳаққоний натижа. Асосий мақсадимиз бўлган гуруҳдан чиқиш вазифаси нуқтаи назаридан қарасак, бу очко — яхши натижа”, — деди Барбарез ўйиндан кейинги матбуот анжуманида.

“Мусобақа жадвали қандай кўриниш олиши мумкинлигини биламиз. Аммо биринчи ўйиндан кейиноқ ҳисоб-китоб қилиш вақти эмас. Кейинги иккита ўйинда ғалаба қозонишга ҳаракат қилишимиз керак”, — дея қўшимча қилди у.

Босния ва Герцеговина терма жамоаси навбатдаги учрашувини 18 июнь куни Швейцарияга қарши ўтказади.