«Кристал Пэлас» ҳужумчиси Жан-Филипп Матета «Милан»га амалга ошмай қолган трансфери мавзусига бошқа қайтмаслигини маълум қилди.

Форвард ўтган қишда «Милан»га ўтишга жуда яқин эди, бироқ тиззасидаги жароҳат сабаб келишув барбод бўлганди. Натижада Матета бир ойга яқин майдондан ташқарида қолди, сўнгра сафга қайтди ва мавсумни Конференциялар лигаси финалидаги ғалаба голи билан якунлади.

«Милан» футболчи номзодига яна қайтиши мумкинлиги ҳақидаги янги хабарларга қарамай, Матета эътиборини ўтмишга қаратмаётганини шаъма қилди.

«Бу мен учун ғалати ва албатта, осон бўлмаган давр эди. «Милан»га ўтиш имконияти бор эди, лекин бу энди ўтмишда қолди. Агар Италияга кетганимда нима бўлишини билмайман», — дея Матетанинг сўзларидан иқтибос келтиради Sport Witness.

«Жароҳатдан сўнг фақат майдонга қайтадиган куним ва Жаҳон чемпионати учун терма жамоа қайдномасига кириш ҳақида ўйладим. Кўп меҳнат қилдим ва якунда бунга эришдим, соғ-саломатман», — дея қўшимча қилди у.

Ҳужумчи Лондон клуби сафида 200 дан ортиқ ўйин ўтказиб, 62 та гол урди ва аста-секин жамоанинг асосий фигураларидан бирига айланди.