Япониялик мухлислар Жаҳон чемпионати гуруҳ босқичи доирасида ўз терма жамоаси Нидерландия билан дуранг (2:2) ўйнаган учрашувдан сўнг, трибуналардаги барча чиқиндиларни йиғиштириб олишди.
ФИФА японияликларнинг барча чиқиндиларни пакетларга солиб, аренадан олиб чиқиб кетаётгани акс этган фотосуратларни эълон қилди. Бундай хулқ-атвор нафақат мухлислар, балки Кун чиқар мамлакат футболчилари учун ҳам анъанавий тус олган.
Хусусан, Россияда бўлиб ўтган ЖЧ-2018 мусобақасида Япония терма жамоаси футболчилар томонидан чиннидек тозалаб қўйилган кийиниш хонаси суратини ижтимоий тармоқларга жойлаштирган эди.
Эслатиб ўтамиз, Нидерландия ва Япония ўртасидаги учрашув 2:2 ҳисобидаги дуранг билан якунланди. Навбатдаги ўйинда Япония Швециядан йирик ҳисобда (1:5) мағлуб бўлган Тунисга қарши майдонга тушади.
Гуруҳнинг иккинчи учрашувида эса Нидерландия терма жамоаси гуруҳ пешқадами — шведларга қарши баҳс олиб боради.
