Испаниянинг «Реал» клуби расмий сайти орқали португалиялик ярим ҳимоячи Бернарду Силва билан шартнома имзоланганини маълум қилди.
Футболчи "Манчестер Сити" билан тузган шартномаси якунланганидан кейин эркин агент сифатида «Реал» сафига қўшилди ва фаолиятини Мадридда давом эттиради.
Томонлар ўртасидаги келишув 2028 йилнинг ёзига қадар амал қилади.
Аввалроқ ОАВда тарқалган маълумотларга кўра, Силванинг «Реал»даги йиллик маоши 20 миллион еврони ташкил этади. Шунингдек, футболчи 10 миллион евро миқдорида имзо бонусига эга бўлади. Унинг агенти Жорже Мендеш ва отаси эса умумий ҳисобда 10 миллион евро комиссия олади.
Ўтган мавсумда Бернарду Силва «Манчестер Сити» сафида барча мусобақаларда 53 та учрашувда майдонга тушиб, 3 та гол урди ва 5 та голли узатмани амалга оширди.
У 2017 йилдан буён Англия клуби шарафини ҳимоя қилиб келган ва шу вақт давомида 19 та совринни қўлга киритган. Улар қаторида олтита Англия Премьер-лигаси чемпионлиги ҳамда битта Чемпионлар лигаси бош соврини ҳам бор.













