Ўзбекистон миллий терма жамоаси футболчиси Аббосбек Файзуллаев Жаҳон чемпионати гуруҳ босқичи 1-туридан ўрин олган Колумбияга (1:3) қарши учрашувдан сўнг ўз фикрлари билан ўртоқлашди. “Оқ бўрилар”нинг ягона голига муаллифлик қилган Файзуллаев ўйин ҳақида ўз фикрларини билдирди.
Файзуллаевнинг таъкидлашича, дастлабки дақиқалардаги ҳаяжонга қарамай, жамоа иккинчи таймда ўз ўйинини кўрсата олган, бироқ қилинган оддий хатолар қимматга тушган.
“Ушбу ўйинда очко олишимиз мумкин эди, чунки йигитлар борини беришди. Дастлабки дақиқаларда барибир ҳаяжон бўлди, бироқ иккинчи тайм бошлангач, ўз ўйинимизни кўрсатишни бошладик ва гол уришга муваффақ бўлдик. Иккинчи голни оддий ўзимизнинг хатомиз туфайли ўтказиб юбордик, барибир бу алам қилади”, дейди Файзуллаев.
Шунингдек, Аббосбек вақт фарқига қарамай, учрашувни кузатиб борган ўзбекистонликларга ва бевосита стадионга келган ишқибозларга ўзининг алоҳида раҳматини айтди:
“Ўзбекистонда туриб ёки бу ерга келиб бизни қўллаб-қувватлаган барча мухлисларга катта раҳмат айтиб қоламан. Чунки эрталаб соат 7 да туриб ўйинни кўриш осон эмас. Биз улардан жуда миннатдормиз. Олдимизда ҳали яна иккита ўйин бор, энди бор эътиборимизни Португалияга қарши баҳсга қаратамиз”.
Маълумот учун, Ўзбекистон терма жамоаси Жаҳон чемпионатидаги иккинчи ўйинини 23 июнь куни Португалияга қарши ўтказади.













