Кот-д’Ивуар терма жамоаси ҳужумчиси Элье Ваи жаҳон чемпионати гуруҳ босқичи 2-туридан ўрин олган Германияга қарши учрашувни ўтказиб юборади. GFFN нашрининг хабар беришича, 23 ёшли форвардга ўйин бўлиб ўтадиган Канада ҳудудига киришга рухсат берилмаган.
Бундан икки ҳафта олдин Ваи Францияда ҳибсга олинган эди. Тергов органлари мамлакат чемпионати доирасидаги «Ницца» ва «Мец» жамоалари ўртасидаги учрашувни ўрганмоқда, ўша ўйинда футболчи сариқ карточка олганди. Қайд этилишича, ушбу баҳсга шубҳали даражада кўп миқдорда гаровлар (ставкалар) тикилган.
Тергов ҳаракатлари олиб борилаётганига қарамай, футболчига ҳозирча ҳеч қандай айблов қўйилмаган. Коррупцияга қарши курашиш бўлимидаги сўроқдан сўнг, унга жаҳон чемпионатига боришга рухсат берилганди. Футболчи АҚШда бўлиб ўтган 1-тур учрашувида майдонга тушган эди.
