АҚШ терма жамоаси ҳужумчиси Фоларин Балогун Жаҳон чемпионати-2026 доирасида Австралияга қарши кечган ўйиннинг (2:0) энг яхши футболчиси деб топилди. 24 ёшли америкалик ҳужумчи баҳс бошида рақиб дарвозаси томон хавфли узатмани амалга оширди ва бу вазият автогол билан якунланди. Шунингдек, у учрашув давомида сариқ карточка олди ва 90+6-дақиқада захирага олинди.

АҚШ терма жамоаси 6 очко билан «D» гуруҳида пешқадамлик қилмоқда ва ЖЧ-2026 плей-офф босқичи йўлланмасини нақд қилиб улгурган. Австралия эса 3 очко билан турнир жадвалининг иккинчи поғонасини банд этган.

Гуруҳ босқичининг 3-турида, 26 июнь куни америкаликлар Туркияга қарши майдонга тушса, австралияликлар Парагвай билан куч синашади.