Ўзбекистон терма жамоаси ярим ҳимоячиси Аббосбек Файзуллаев ЖЧ-2026даги тарихий ўйиндан кейин Колумбия ижтимоий тармоқларида катта машҳурликка эришди.
Ўзбекистон терма жамоаси Колумбияга 1:3 ҳисобида мағлуб бўлганига қарамай, 22 ёшли вингер лотинамерикалик мухлислар эътиборини ўзига жалб қилди. Файзуллаевнинг исми X ва Instagram ижтимоий тармоқларида трендга айланди.
Колумбиялик фойдаланувчилар, айниқса қизлар футболчининг ташқи кўринишини юқори баҳолаб, уни «Мундиалнинг энг ёқимтой футболчиси» деб аташмоқда. Шунингдек, мухлислар Файзуллаевни Колумбия терма жамоасининг асосий футболчиларидан бири ҳисобланган «Бенфика» ярим ҳимоячиси Ричард Риос билан таққослашмоқда.
Эслатиб ўтамиз, Ўзбекистон терма жамоасининг жаҳон чемпионатлари тарихидаги илк учрашувида Аббосбек Файзуллаев мамлакатимиз футбол тарихидаги биринчи мундиал голига муаллифлик қилди.
Мехикодаги «Ацтека» стадионида бўлиб ўтган баҳснинг 60-дақиқасида жамоа сардори Элдор Шомуродов хавфли зарба йўллади. Колумбия дарвозабони Камило Варгас тўпни қайтарган бўлса-да, у узоқ устун томонга йўналди. Вазириятни кузатиб турган Файзуллаев эса боши билан тўпни дарвоза тўрига йўллаб, тарихий голни урди.













