Португалия терма жамоаси ҳимоячиси Рубен Диаш жаҳон чемпионатининг стартдаги ўйинида ДР Конго билан қайд этилган дурангдан (1:1) сўнг, жамоа сардори Криштиану Роналду шаънига айтилган танқидлар ҳақида фикр билдирди.

«Танқидлар биз учун катта аҳамиятга эга эмас. Бу шунчаки муваффақиятсиз ўйиндан кейин доим юзага келадиган шов-шувдир. Биз ўзимизни кераксиз муҳокамалардан ҳимоя қилишга ҳаракат қиламиз», - деди ҳимоячи Independent нашрига берган интервьюсида.

Футболчи Роналду матбуот ва жамоатчилик томонидан бўладиган бундай юқори эътиборга аллақачон кўникиб кетганини таъкидлади.

«Криштиану бундай босим билан жуда яхши таниш — клубларда ҳам, терма жамоада ҳам, йирик турнирларда ҳам. Жаҳон чемпионатида ҳамма нарсани идеал даражада бажаришнинг иложи йўқ. Ўйиндан ўйинга юқори даража кўрсата олган жамоа ғалаба қозонади», - дея таъкидлади Диаш.

Португаллар турнирдаги навбатдаги учрашувни Ўзбекистонга қарши ўтказишади. Ўйин 23 июнь куни бўлиб ўтади.