Жаҳон чемпионати–2026 гуруҳ босқичининг 2-турида Бразилия терма жамоаси Гаити устидан 3:0 ҳисобида ишончли ғалабага эришди.
Ушбу йирик муваффақият эвазига «селесао» дунё биринчиликларида урилган голлар сони бўйича яна биринчи ўринга кўтарилиб олди. Эндиликда бразилияликлар ҳисобида 241 та гол мавжуд.
Карло Анчелотти шогирдлари бу кўрсаткич бўйича ўз активларида 239 та гол бўлган Германия терма жамоасини қувиб ўтишди. Эслатиб ўтамиз, «бундестим» жорий Жаҳон чемпионатидаги илк ўйинида Кюрасаони 7:1 ҳисобида тор-мор этган эди.
Дунёнинг энг нуфузли турнири 11 июнь куни АҚШ, Канада ва Мексика майдонларида старт олди ва у 19 июлга қадар давом этади. Амалдаги чемпион — Аргентина терма жамоаси ҳисобланади.
